„Það er erfitt að lifa með skömminni. Svo bætist líka óttinn ofan á,“ segir Eva Dís Þórðardóttir, leiðbeinandi hjá Stígamótum en hún leiddist útí í vændi eftir að hafa verið misnotuð kynferðislega sem barn. Hún bendir á að skaðlegustu áhrif kynferðisofbeldis séu vændi og sjálfsvíg en sjálf þekkir hún ófáar konur sem hafa leiðst út í vændi og bundið enda á líf sitt í kjölfarið.
Eva Dís steig fram í söfnunarþætti Stígamóta sem sýndur var í nóvember 2016 og vakti frásögn hennar mikla athygli. Í þættinum sagði Eva frá því hvernig hún leiddist út í vændi eftir að hafa verið misnotuð kynferðislega frá barnæsku. Eftir misnotkunina var Eva í nokkrum ofbeldisfullum samböndum. Meðal annars var hún í sambandi við mann sem kynnti hana fyrir BDSM. Sem Eva segir að hafi í raun ekki verið BDSM þar sem hún fékk engu að ráða um hvar mörkin lágu.
Í viðtalinu sagði Eva að maðurinn hafi verið eldri, á listamannalaunum og hafi haft nógan tíma til að atast í henni. Meðal annars vildi hann að hún gerði þarfir sínar í kattakassa.
Eftir þessa reynslu leiddist Eva út í vændi, en hún var búsett í Danmörku á þeim tíma. Hún segir að sér hafi fundist æðislegt að vera í vændinu, hún hafi búið sér til persónu með annað nafn svo í raun var það ekki hún sem var í vændi. Það var hennar leið til að takast á við raunveruleikann.
„Þegar maður er í vændi þá verður maður að segja að þetta sé æðislegt. Ég hef enga trú á því að hamingjusama hóran sé til,“
sagði Eva og kvaðst um leið geta fullyrt að konur sem fara í vændi hafi orðið fyrir kynferðisofbeldi. Þá greindi hún frá því hvernig kynni hennar af Stígamótum áttu eftir að marka straumhvörf í lífi hennar.
Í viðtali við Þjóðbraut á Hringbraut í liðinni viku nefndi Eva sem dæmi að á meðan hún sótti stuðningshóp hjá Stígamótum þá hafi ein kvennanna í hópnum framið sjálfsvíg.
„Það var mikið sjokk fyrir okkur í hópnum, hún tók líf sitt á meðan hún stóð.“
Hún segir jafnframt erfitt að lifa með afleiðingum þess að hafa stundað vændi:„ Nú seldi ég mig úti í Danmörku þannig að ég er tiltölulega laus við þennan ótta að þurfa að rekast á menn sem hafa brotið á mér einhvers staðar í þjóðfélaginu, núna er þetta lítið þjóðfélag sem við búum í. En konur sem eru að selja sig á Íslandi, þær búa við þennan ótta. Að rekast á þessa menn úti í samfélaginu, jafnvel í fréttaþáttum í sjónvarpinu.“
Þá sagði hún kaupendur vændis vera ósköp venjulega menn, yfirleitt unga karlmenn.
„Það er einhver svona klámvæðing í þjóðfélaginu. Nú er nýleg grein sem sýnir fram á það að strákar niður í 11 ára gamlir eru farnir að nota klám og á meðan eru ranghugmyndir um að karlar eigi rétt á kynlífi eða að kynlíf sé einhver þörf sem að þurfi að uppfylla. Að það sé þá í lagi að fróa sér á annarri manneskju, að það sé ásættanleg hegðun.“
