Hlutverk afa og ömmu í lífi barnabarnanna er oft ómetanlegt en það er mikilvægt fyrir afa og ömmu að vera meðvituð um hvaða áhrif sum orð þeirra geta haft á börnin, bæði andlega og tilfinningalega.

Sofia Lewicki, sálfræðingur, sagði í samtali við Clarin að setningar, sem virðast mjög saklausar, geti valdið óöryggi hjá börnum.

Hún tók sem dæmi þegar afi og amma leyfa barnabörnunum svolítið aukalega, til dæmis að horfa á teiknimynd seint að kvöldi eða að borða meira nammi en þau fá venjulega. Við slíkar aðstæður er ekki óalgengt að afa og ömmu detti í hug að segja: „Þetta er litla leyndarmálið okkar.“ En það þarf að fara varlega í þetta að sögn Lewicki.

Hún sagði að þessi setning, sem virðist mjög sakleysisleg, geti kennt börnunum að það sé í lagi að leyna hlutum og það geti verið skaðlegt.

Önnur setning, sem er ekki góð, er þegar afi og amma segja: „Mamma þín vill þetta ekki“ en leyfa samt það sem er verið að ræða um.

Þetta getur að sögn Lewicki grafið undan valdi foreldranna og ruglað barnið í ríminu því það getur fyllst efasemdum um hver setur reglurnar.

Hún lagði áherslu á að afi og amma eigi ekki endilega að fylgja reglum foreldranna algjörlega en það sé mikilvægt að virða þau mörk sem séu sett.