Spurningunni um hvort það hafi verið hænan eða eggið sem kom fyrst hefur oft verið varpað fram. Ekki eru allir sammála um svarið við henni en ef kafað er ofan í málið kemur í ljós að vísindin hafa vitað svarið áratugum saman.

Þetta kemur fram í umfjöllun Danska ríkisútvarpsins um málið. Þar er haft eftir Michael Ørsted, doktor við Álaborgarháskóla, að ef litið sé til þróunarsögunnar sé enginn vafi á að eggið hafi komið fyrst. Egg hafi verið til löngu áður en eitthvað sem minnir á fugla, þar á meðal hænur, hafi komið fram á sjónarsviðið.

Hann sagði að vísindamenn hafi verið fullvissir um þetta síðan á tíunda áratugnum en í raun hafi þetta verið vitað í 100 ár en það hafi ekki verið fyrr en á tíunda áratugnum sem steingervingar hafi fundist sem sönnuðu þetta endanlega.

Hænuegg, eins og við þekkjum þau í dag, eru þróuð útgáfa af frumgerðum eggja, til dæmis eins og þeim sem koma frá fiskum. Þróunin yfir í hænuegg byrjaði sem sagt á einhverju sem líkist fiskieggjum nútímans. Fiskar og pöddur verpa eggjum en þau eru í himnu þar sem þeim er verpt í vatn. Frá svona eggjum þróuðust egg sem líkjast eggjum skriðdýra nútímans, á einföldu máli er hægt að segja að skurnin hafi orðið þykkari en í eggjum fiska. Þetta á til dæmis við um krókódíla, egg þeirra þurfa að vera í röku umhverfi en þurfa ekki að vera í vatni því skurnin er þykkari. Skurnin er þó mjúk miðað við hænuegg.

Vísindamenn telja að egg af þessu tagi hafi síðan þróast yfir í egg eins og við þekkjum í dag hjá fuglum. Þessi þróun átti sér stað hjá risaeðlum en egg þeirra voru með hörðum skurni og komu fram á sjónarsviðið fyrir um 350 milljónum ára. Egg, eins og við þekkjum þau, voru því komin fram á sjónarsviðið þegar risaeðlur gengu um hér á jörðinni. Fuglar þróuðust út frá risaeðlum og því kom eggið fyrst.