En maðurinn ætti í raun að vera hinum megin við fangelsismúrana því hann á að vera að afplána dóma fyrir morð og nauðgun í þessu fangelsi í Arkansas í Bandaríkjunum.
En honum tókst að flýja og hann er ekki bara einhver maður út í bæ. Hann heitir Grant Hardin og er 59 ára. Hann hafði verið í fangelsi síðan í október 2017 en þá játaði hann að hafa myrt hinn 59 ára James Appleton.
CNN segir að lögreglan geri nú mikla leit að Hardin sem var yfirmaður í lögreglunni þegar hann myrti Appleton. Hann skaut hann í höfuðið og geymdi líkið í bíl. Lögreglan fann líkið og Hardin játaði morðið. Hann var dæmdur í 30 ára fangelsi fyrir það.
Þetta hljómar svo sem eins og mörg önnur ofbeldismál, sem við heyrum um í Bandaríkjunum, en það gerir þetta mál auðvitað óvenjulegt að Hardin var lögreglumaður og að hann hlaut annan dóm síðar. Eftir að hann var dæmdur í fangelsi var DNA hans skráð í gagnagrunn Arkansas yfir afbrotamenn. Þá birtust upplýsingar á skjánum um að DNA hans passaði við DNA manns sem nauðgaði grunnskólakennara 1997 og einnig við annað nauðgunarmál. Hann var dæmdur í 50 ára fangelsi fyrir þessi tvö mál.
Sem sagt, 80 ára fangelsisdómar yfir honum og það ætti auðvitað að þýða að hann verði í fangelsi til æviloka en honum tókst nýlega að flýja og leikur nú lausum hala.
Honum tókst að flýja skömmu eftir að tíu öðrum föngum tókst að flýja úr fangelsinu. Tveir þeirra leika enn lausum hala en 13 manns hafa verið handteknir vegna flóttans, þar á meðal einn starfsmaður lögreglunnar.
BBC segir að litlar upplýsingar hafi fengist um hvernig Hardin bar sig að við flóttann annað en að hann klæddist fatnaði sem líkist einkennisfatnaði lögreglumanna. Á upptökum sést hann ganga með kerru sem í voru kassi og hlutir sem virðast vera úr tré.
Lögreglan telur að hann hafi einfaldlega gengið út í gegnum vaktað hlið þar sem allir eiga að gera grein fyrir sér og ferðum sínum.
