Kýst þú helst að drekka svart kaffi? Ef svo er þá ert þú líklega hrifin(n) af dökku súkkulaði. Að minnsta kosti ef marka má niðurstöður nýrrar rannsóknar sem beindist að því að komast að hvort erfðafræðilegir þættir valdi þessu.

Niðurstaðan er einmitt að það eru erfðir sem ráða því að sumir eru hrifnir af svörtu kaffi og dökku súkkulaði. CNN skýrir frá þessu. Haft er eftir Marilyn Cornelis, við Northwestern University Feinberg School of Medicine, sem vann að rannsókninni að þeir sem séu hrifnir af svörtu kaffi og dökku súkkulaði hafi unnið í lottói hvað varðar erfðaþætti því þetta geti ýtt undir gott heilsufar.

Hún sagði að vitað sé að sífellt fleiri gögn bendi til þess að það hafi góð áhrif á heilsuna að drekka kaffi en það þurfi að lesa á milli línanna því hver sá sem ráðleggur fólki að drekka kaffi muni venjulega ráðleggja því að drekka svart kaffi en ekki kaffi með mjólk og/eða sykri. Svarta kaffið sé hitaeiningasnautt en hitt geti innihaldið mörg hundruð hitaeiningar.

Rannsóknir hafa sýnt að hóflega neysla á kaffi, 3 til 5 bollar á dag, getur dregið úr líkunum á að fólk fái Parkinsonssjúkdóminn, hjartasjúkdóma, sykursýki 2 og sumar tegundir krabbameins.