Áður óþekkt risaeðlutegund hefur uppgötvast á Grænlandi. Það var árið 1994 sem alþjóðlegur hópur vísindamanna vann að rannsóknum á steingervingum í austurhluta landsins. En það er núna fyrst sem niðurstaða enn ítarlegri rannsókna á steingervingunum liggur fyrir. Þær leiddu í ljós að steingervingur risaeðlu er ekki af risaeðlu af tegundinni Plateosaurur eins og áður var haldið. Það er tegund sem hélt til þar sem nú er Evrópa.

Sermitsiaq skýrir frá þessu. Nýja tegundin hefur fengið nafnið issi saaneq sem þýðir bein á grænlensku. Rannsóknin hefur verið birt í vísindaritinu Diversity.

Nánar tiltekið þá voru það tvær næstum heilar höfuðkúpur sem fundust á Jameson Land sem voru rannsakaðar. Rannsóknirnar leiddu í ljós að risaeðlurnar voru uppi fyrir um 214 milljónum ára og voru plöntuætur.

Sermitsiaq hefur eftir Jesper Milán, hjá jarðfræði- og landafræðideild Kaupmannahafnarháskóla, sem vann að rannsókninni að niðurstöðurnar skipti máli hvað varðar þekkingu okkar á útbreiðslu risaeðla. „Þetta þýðir að nú er miklu meiri vinna fram undan því nú vitum við allt í einu ekki hvernig útbreiðslu þeirra var háttað. Einnig verður að rannsaka aðra steingervinga betur til að sjá hvort við getum fræðst betur um ættartré risaeðlanna,“ sagði hann.