Á föstudaginn var Perez Reed, 25 ára, handtekinn þegar hann steig út úr járnbrautarlest í bænum Independence í Missouri. Alríkislögreglan FBI telur að Reed hafi myrt sex manns frá því um miðjan september og þar til í lok október. Að auki hafi hann sært tvo.

CNN skýrir frá þessu. Morðin áttu sér að sögn stað í Missouri, þar sem Reed býr, og Kansas.

Reed var vopnaður skotvopni þegar hann var handtekinn. Passar stærð þess við skotin sem fundust í sumum fórnarlambanna.

Daily Beast segir að fyrsta fórnarlambið hafi verið 16 ára stúlka sem fannst myrt 13. september,  þremur dögum síðar var það 49 ára kona, þremur dögum eftir það 24 ára karlmaður og fertugur karlmaður 26. september.  1. nóvember  fundust 35 ára karlmaður og 25 ára kona myrt og þá komst lögreglan á slóð Reed.

Að sögn var það húðflúr af hálfu tungli á enni hans sem kom upp um hann en hægt var að greina það á upptökum úr eftirlitsmyndavél á síðasta morðvettvanginum. Einnig sýna rafræn spor að farsími hans var notaður á mörgum af morðvettvöngunum.

Daily Beast segir að við handtökuna hafi Reed verið í skóm sem lögreglan hafi tengt við suma morðvettvangana.

Hann neitar sök en hann hefur aðeins verið kærður fyrir tvö morð eins og er en unnið er að rannsókn á hinum morðunum og tengslum hans við þau.