Staðan í Afganistan hefur líklega ekki farið fram hjá neinum sem fylgist með heimsfréttunum, en síðastliðinn sunnudag náðu Talíbanar völdum þar í landi. Helsti leiðtogi Talíbana er Haibatullah Akhundzada, en það er annar maður sem er helsta andlit þeirra og pólitískur stjórnandi. Það er Abdul Ghani Baradar. Því hefur verið kastað upp að hann verði næsti leiðtogi Afganistan.
Í sjónvarpsávarpi er varðaði fall Kabúl sagði Baradar að raunverulegt verkefni Talíbana væri rétt að byrja.
Fjallað er um Bardar í grein sem birtist í The Guardian, en þar er honum lýst sem óumdeilanlegum sigurvegara stríðsins í Afganistan sem varði í tuttugu ár. Hann var nefnilega látinn laus úr fangelsi í Pakistan fyrir minna en þremur árum síðan og það að beiðni Bandaríkjanna.
Hann fæddist í Uruzgan-héraði árið 1968 og barðist ungur við Sóvétríkin í stríði sem þeir háðu í Afganistan á níunda áratug síðustu aldar. Eftir að Sovétmenn drógu herlið sitt frá landinu árið 1989 tók við borgarastyrjöld. Bardar kom þá á fót madrassa, sem er einskonar íslamskur skóli, ásamt Mohammad Omar, sem hafði verið liðsforingi hans í stríðinu. Saman stofnuðu þeir Talíbanahreyfinguna og fengu unga menn til að ganga til liðs við sig.
Árið 1996 náðu Talíbanar völdum í stærstum hluta Afganistan undir stjórn Mohammad Omar og með hjálp frá ISI, pakistönsku leyniþjónustunni. Talið er að Bardar hafi verið lykilmaður í ótrúlegum árangri Talíbananna og að herkænska hans hafi komið sér vel.
Á meðan Talíbanar voru við völd sinnti hann mikilvægum störfum og var meðal annars staðgengill varnarmálaráðherra þegar Bandaríkjamenn réðust inn í Afganistan árið 2001.
Eftir yfirtöku Bandaríkjanna hélt Bardar áfram að starfa fyrir Talíbana. Ríkisstjórn Barracks Obama hafði talsvert meiri áhyggjur af honum en Bush-stjórnin. CIA, Leyniþjónusta Bandaríkjanna leitaði hans og fann hann árið 2010. Í kjölfarið var ISI fengin til þess að handtaka hann.
Bardar sat í fangelsi í Pakistan til ársins 2018 þegar Donald Trump var orðinn Bandaríkjaforseti. Sendiherra Bandaríkjanna í Afganistan bað Pakistana að láta Bardar lausan svo hann gæti hjálpað til við að semja um frið í Afganistan
Bardar skrifaði undir Doha-sáttmálann við Bandaríkin í febrúar í fyrra. Stjórn Trump talaði um að þar hafi unnist stór sigur í átt að friði í Afganistan en nú lítur sá samningur frekar út eins og stórt skref Talíbana í að ná aftur völdum.
Í samningnum kom fram að stjórnvöld í Kabúl og Talíbanar áttu að semja um úrlausn mála, í stað þess að berjast um hana. Svo virðist vera sem Talíbanar hafi hreinlega beðið eftir því að Bandaríkjamenn myndu yfirgefa landið, svo þeir gætu tekið það yfir.
