Í júní fundust 43 lík af ólöglegum innflytjendum sem voru á leið til Bandaríkjanna frá Mexíkó. Mánuðurinn var heitasti júnímánuður sögunnar í Phoenix en hitinn fór margoft yfir 43 gráður en það er svipaður hiti og er venjulega í Sonoraneyðimörkinni.

The Guardian skýrir frá þessu. Fram kemur að það séu samtökin Humane Borders sem hafi skráð líkfundina út frá gögnum frá réttarmeinafræðingum í Tucson.

Þetta eru óvenjulega mörg dauðsföll í einum mánuði en þeim fjölgaði einnig í Texas í júní en þar hefur verið óvenjulega heitt í sumar.

Af þessum 43 höfðu 16 verið látnir í einn dag þegar þeir fundust og 13 í tæplega viku. Ekki er vitað hvenær hinir létust en skráningarnar miðast við hvenær líkin finnast.

Á fyrri helmingi ársins fundust 127 lík en voru 96 á sama tíma á síðasta ári.

Embættismenn í Texas segja að fleiri ólöglegir innflytjendur hafi látist á þessu ári en síðustu ár í tilraunum sínum við að komast til Bandaríkjanna.