Sky News hefur þetta eftir Dr Clare Wenham, prófessor í alþjóðaheilbrigðisfræðum við London School of Economics. „Eins og staðan er núna sýna gögn að það verði ekki fyrr en 2023/2024 sem búið verður að koma bóluefnum til allra í heiminum. Það er langur tími. Það að dreifa hluta þeirra núna gæti fært okkur líf í eðlilegum farvegi fyrr,“ er haft eftir henni.
Hún sagði einnig að þegar búið verður að bólusetja alla á Bretlandi verði áfram að hafa landamæraeftirlit vegna þeirrar ógnar sem geti stafað frá stökkbreyttum afbrigðum veirunnar. „Þessi faraldur er ekki afstaðinn fyrr en hann er afstaðinn um allan heim,“ sagði hún.
„Við munum áfram búa við einhverskonar takmarkanir, ferðatakmarkanir, landamæraeftirlit – meira að segja þegar búið verður að bólusetja okkur, þar til búið er að bólusetja um allan heim. Það er því til mikils að vinna að tryggja að allir um allan heim séu að minnsta kosti með lágmarksskammt af bóluefnum á sama tíma,“ sagði hún einnig.
Alþjóðaheilbrigðisstofnunin WHO hefur hvatt Breta til að gera hlé á bólusetningum þar í landi um leið og búið er að bólusetja forgangshópa til að hægt verði að koma bóluefnum til annarra ríkja, fátækra ríkja. Tedros Adhanom Ghebreyesus, forstjóri WHO, hefur ítrekað sagt að dreifa verði bóluefnum á jafnan og sanngjarnan hátt og hefur varað við að „ég fyrst“ hugsunin muni ekki gera annað en að lengja í faraldrinum og valda bæði mannlegum og efnahagslegum þjáningum.
