Falklandseyjar eru í Atlantshafi, undan ströndum Argentínu, og eru breskt yfirráðasvæði. Eyjarnar eru með sjálfsstjórn en Bretar sjá um utanríkismál og varnarmál.
Sky News hefur eftir talsmanni varnarmálaráðuneytisins að það sé ákveðin áskorun að flytja bóluefni til Falklandseyja vegna fjarlægðar þeirra frá Bretlandi og veðurfarslegra aðstæðna á leiðinni og við eyjurnar. Það þurfti að skipuleggja ferðina mjög vel því geyma þarf bóluefnið í frosti og varð áhöfn flugvélarinnar að tryggja að frost væri á bóluefninu alla leiðina.
Leona Roberts, þingmaður á þingi eyjanna, fagnaði sendingunni og sagði í samtali við Sky News að þetta væri jákvætt skref í að vernda íbúanna gegn kórónuveirunni en um 3.500 manns búa á eyjunum. „Þrátt fyrir að við séum í um 8.000 mílna fjarlægð erum við svo sannarlega hluti af bresku fjölskyldunni. Við vitum hversu erfitt ástandið er í Bretlandi og erum því bresku ríkisstjórninni mjög þakklát fyrir að styðja okkur. Þetta mun skipta miklu máli,“ sagði hún.
Í fyrstu verða það íbúar eldri en fimmtíu ára sem verða bólusettir auk þeirra sem þykja í aukinni áhættu á að fara illa út úr smiti sem og framlínufólk.