Dönsk heilbrigðisyfirvöld hafa ákveðið að loka nokkrum einkasjúkrahúsum í landinu vegna COVID-19 faraldursins. Ástæðan er að á sjúkrahúsunum er til mikilvægur búnaður sem er hægt að nota í baráttunni gegn veirunni.

Heilbrigðisyfirvöld hafa því fyrirskipað sjúkrahúsunum að hætta öllum aðgerðum frá og með 28. mars og að frá 30. mars eiga þau að veita opinbera heilbrigðiskerfinu aðgang að þeim öndunarvélum og tækjum sem notuð eru við svæfingar á sjúklingum. Einnig fara heilbrigðisyfirvöld fram á að sjúkrahúsin veiti hinu opinbera heilbrigðiskerfi aðgang að starfsfólki sínu og nauðsynlegum búnaði ef þörf krefur.

TV2 skýrir frá þessu en fréttastofan hefur komist yfir skjöl frá heilbrigðisyfirvöldum með upplýsingum um þetta.