Á meðan Donald Trump, Bandaríkjaforseti, berst með kjafti og klóm fyrir að geta setið áfram á forsetastól í Hvíta húsinu næstu fjögur árin er hugur Melania, eiginkonu hans, allt annars staðar að sögn. Hún er sögð vera á fullu að undirbúa flutning úr Hvíta húsinu.

Út á við stendur hún þétt við hlið eiginmannsins en samkvæmt því sem orðrómar í Washington segja þá hefur Melania lengi verið að undirbúa flutning úr Hvíta húsinu til New York og Flórída. CNN skýrir frá þessu. „Hún vill bara flytja heim,“ hefur CNN eftir einum heimildarmanni.

Af þessum sökum er Melania sögð vera á fullu við að ákveða hvaða innanstokksmuni á að setja í geymslu, hvað á að flytja í Trump Tower í New York og hvað á að fara í Mar-a-Lago á Palm Beach en þar eiga hjónin einnig athvarf.

Hún er einnig sögð hafa kannað möguleikana á að koma sér upp skrifstofu í Flórída og skoðað í hvaða skóla sé hægt að senda Barron, 14 ára son þeirra hjóna.

Talsmaður Melania segir að hún sé upptekin við að sinna skyldum sínum sem forsetafrú og að dagar hennar sé þéttskipaðir ýmsum verkefnum.