Þetta er ein af þeim kenningum sem lögreglan vinnur einna mest með þessar vikurnar að því er segir í umfjölunn VG. Blaðið segir að mikilvægar vísbendingar hafi fundist á heimilinu og bendi þær til að Anne-Elisabeth hafi ekki verið rænt, heldur hafi hún verið myrt þennan örlagaríka morgun.
Sérfræðingar lögreglunnar eru sagðir hafa fundið ummerki í húsinu sem sýna að einhver hafi verið dregin eftir gólfum þar. Það styrkir þennan grun að eitt og annað sem tengist klæðnaði hennar hefur að sögn fundist auk lífsýna. Allt þetta hefur styrkt lögregluna í þeirri trú að Anne-Elisabeth hafi verið myrt í húsinu.
Undirréttur í Nedre Romerike hefur einnig komist að þeirri niðurstöðu að margvísleg gögn bendi til að Anne-Elisabeth hafi verið myrt í húsinu.
Málið var í upphafi rannsakað sem mannrán því lausnargjaldskrafa var sett fram. Þegar leið á rannsóknina fór grunur lögreglunnar að beinast að eiginmanni Anne-Elisabeth, Tom Hagen, og nýlega var hann handtekinn og úrskurðaður í gæsluvarðhald. Hann var látinn laus nokkrum dögum síðar eftir að Hæstiréttur felldi gæsluvarðhaldsúrskurðinn úr gildi. Hann neitar að hafa komið nálægt hvarfi og væntanlega morðinu á eiginkonunni en lögreglan er enn þeirrar skoðunar að hann tengist málinu.
