Úlfum fer nú hægt og rólega fjölgandi í Danmörku en aðeins eru nokkur ár síðan þeir settust að í landinu á nýjan leik eftir 200 ára fjarveru. Dönsku úlfarnir eru úr stofni úlfa sem heldur til í Póllandi og Þýskalandi en pólskir úlfar fóru að hreiðra um sig í Þýskalandi um aldamótin. Í apríl og maí bættust tvö karldýr í hóp dönsku úlfanna en þau komu frá Þýskalandi til Jótlands.

Þetta kemur fram í umfjöllun Danska ríkisútvarpsins. Fram kemur að vísindamenn séu nokkuð vissir um þetta og byggi þá vissu á niðurstöðum DNA-rannsókna á hræjum dádýra sem úlfarnir hafa lagt að velli. Fyrir voru að minnsta kosti fimm fullorðnir úlfar í Danmörku, þar af eitt úlfapar með sex hvolpa.

Annar nýju úlfanna er með merkið GW1156m og hann hefur svo sannarlega komið við sögu í Þýskalandi þar sem hann er fæddur. Samkvæmt frétt Bild þá drap umræddur úlfur 33 kindur í norðanverðu Þýskalandi frá því í apríl og fram í maí.