Skandinavíska flugfélagið SAS íhugar nú að stofna nýtt flugfélag. Ástæðan er að félagið er að skipta vélum frá Boeing út fyrir nýrri og stærri Airbus vélar. Af þessum sökum þarf félagið á 20-30 meðalstórum flugvélum, með sæti fyrir 120 til 150 farþega, að halda til að mæta þörfum viðskiptavina sinna.

SAS hefur opnað á möguleikann að kaupa flugvélar af þeirri stærð fyrir marga milljarða ef hægt er að ná góðum kjarasamningum við flugmenn og flugliða. Ef það gengur upp verða vélarnar reknar af sjálfstæðu flugfélagi í eigu SAS. Annar möguleiki sem er uppi á borðinu er að láta verktaka sjá um þetta flug eins og er nú þegar gert með litlar vélar sem fljúga stuttar vegalengdir.

Rickard Gustafson, forstjóri SAS, segir að þetta verði að vera komið á hreint fyrir 2023, ef ekki takist að leysa úr þessu muni leiðakerfi SAS dragast saman.

SAS fær 20 Airbus A321 Neo vélar á næsta ári en þær eru með 180 sæti hver. Þær koma í stað minni véla sem verða teknar úr notkun. Sama þróun verður síðan árin á eftir. Vandinn sem SAS stendur frammi fyrir er að félagið er með margar flugleiðir í Skandinavíu og Norður-Evrópu sem þessar nýju vélar eru of stórar fyrir miðað við eftirspurn. Það er dýrt að reka of stórar flugvélar og því liggur á að finna lausn á þessu.