Mette-Marit, krónprinsessa Noregs, baðst í gær afsökunar á að hafa umgengist bandaríska barnaníðinginn Jeffrey Epstein. Epstein tók eigið líf fyrr á árinu þegar hann sat í gæsluvarðhaldi og beið þess að réttarhöld yfir honum hæfust en hann var ákærður fyrir mansal og kynferðisbrot gegn fjölda barnungra stúlkna.

Málið hefur þegar haft mikil áhrif á bresku konungsfjölskylduna því Andrew prins hefur að mestu verið settur til hliðar í kjölfar ásakana um að hann tengist misnotkunarmálum Epstein en þeir voru vinir. Prinsinn hélt áfram sambandi við Epstein eftir að hinn síðarnefndi var sakfelldur fyrir að selja barnunga stúlku í vændi árið 2008.

Nú er röðin komin að Mette-Marit að biðjast afsökunar á tengslum sínum við Epstein en hún hitti hann margoft á árunum 2011 til 2013, eftir að hann hafði verið sakfelldur fyrir kynferðisbrot.

„Ég hefði aldrei haft neitt með Epstein að gera ef ég hefði vitað um alvarleika afbrota hans. Ég hefði átt að kanna fortíð Epstein betur og ég biðst afsökunar á að hafa ekki gert það.“

Segir í yfirlýsingu sem norska hirðin sendi frá sér í gær.