Steve Easterbrook, forstjóri McDonald’s, hefur verið rekinn úr starfi eftir að upp komst að hann hafði átt í ástarsambandi við starfsmann fyrirtækisins. Steve var yfirmaður konunnar og samkvæmt reglum McDonald’s er slíkt bannað og brottrekstrarsök.

Steve er Breti sem hafði unnið fyrir McDonald’s í aldarfjórðung og klifið metorðastigann hægt og rólega. Hann var mikils metinn og var á býsna góðum launum; hann fékk tæpa tvo milljarða króna á ári í laun.

Í bréfi sem hann sendi samstarfsfólki sínu játaði hann að hafa gert „mistök“ og sýnt dómgreindarleysi. Hann skildi við eiginkonu sína fyrir skemmstu en saman eiga þau þrjú börn.

Gengi hlutabréfa í McDonald’s féllu nokkuð við þessi tíðindi.