Kim Kardashian er á meðal þeirra sem beita sér í máli Rodney Reed, fanga á dauðadeild í Texas, sem til stendur að taka af lífi þann 20. nóvember næstkomandi.

Hefur hún krafist þess að mál hans verði tekið upp að nýju, en fleiri frægar stjörnur á borð við Rihönnu, Busta Rhymes og LL Cool J. hafa beitt sér á sambærilegan hátt í málinu.

Rodney þessi var sakfelldur fyrir nauðgun og morð á konu að nafni Stacey Stites árið 1996. Mál Rodney hefur vakið talsverða athygli vestanhafs enda eru margir á því að rannsókn lögreglu hafi verið mjög ábótavant. Þá hafi lögmenn Rodney á sínum tíma gert sig seka um slæm mistök þegar þeir kölluðu ekki til vitni sem gat veitt Rodney skothelda fjarvistarsönnun.

Loks hafi annar fangi fullyrt að maður að nafni Jimmy Fennell hafi játað í sín eyru að hann bæri ábyrgð á morðinu, en Fennell þessi var unnusti Stites á þeim tíma sem morðið var framið. Hann hafi reiðst þegar hann komst að því að Stites og Rodney hefðu átt í ástarsambandi og drepið hana. Fennell hefur komist í kast við lögin en hann sat inni fyrir nauðgun og mannrán á sínum tíma.

Kim Kardashian vakti athygli á máli Rodneys á Twitter og biðlaði til ríkisstjóra Texas að náða Rodney.