Þýska bóndanum Willi Weisser brá heldur betur aðfaranótt sunnudags þegar hann stóð í eldhúsinu heima hjá sér í Limburg og drakk vatn. Skyndilega heyrðist mikill hvellur og húsið nötraði. Í samtali við Frankfurter Neue Presse sagði hann að hann hafi haldið að um jarðskjálfta væri að ræða.

En hér var ekki um jarðskjálfta að ræða heldur hafði 250 kílóa sprengja sprungið í aðeins 150 metra fjarlægð frá heimili hans sem er um 70 km norðan við Frankfurt.

Enginn slasaðist í sprengingunni en eins og myndin, sem fylgir þessari frétt, sýnir þá myndaðist myndarlegur gígur á akrinum eða fjögurra metra djúpur og tíu metrar í þvermál.

Lögreglan telur að sprengjan hafi verið frá því í síðari heimsstyrjöldinni. Öðru hvoru finnast ósprungnar sprengjur úr síðari heimsstyrjöldinni í Þýskalandi en talið er að um 3.000 ósprungnar sprengjur sé þar að finna.