Sadiq Khan, borgarstjóri í Lundúnum, er ekki efstur á vinsældalista margra vegna vilja hans og aðgerða til að bæta loftgæðin í stórborginni. Í byrjun apríl verða ökumenn eldri bíla að greiða hærri vegtolla fyrir að aka í miðborg Lundúna en fram að þessu. Tollarnir verða tvöfaldaðir og munu nema sem svarar til rúmlega 3.500 íslenskra króna í hvert sinn sem ekið er inn í miðborgina. Þetta er nýjasta aðgerð Khan til að reyna að bæta loftgæðin.

The Guardian skýrir frá þessu. Blaðið segir að 56 prósent Lundúnabúa styðji þessar aðgerðir en 40 prósent séu þeim mótfallnir. Healthy Air hópurinn, sem berst fyrir bættum loftgæðum í borginni, hrósar Khan fyrir aðgerðirnar en The Motorcycle Action Group, samtök bifhjólaeigenda, eru á móti þeim og segja að þetta komi sér sérstaklega illa fyrir mörg þúsund manns sem aka gömlum mótorhjólum en sérstök gjöld verða lögð á þau ökutæki sem menga mest.