Það er full ástæða til að hafa áhyggjur af al-Kaída hryðjuverkasamtökunum að sögn breska öryggismálaráðherrans Ben Wallace. Hann segir raunverulega hættu á að al-Kaída ráðist á evrópska flugvelli eða flugvélar á næstunni.

Í samtali við The Sunday Times sagði hann að al-Kaída hafi nú risið úr öskustónni í kjölfar ósigra Íslamska ríkisins í Sýrlandi og Írak.

„Al-Kaída sat þögult í horninu og reyndi að finna út hvernig 21. öldin mun líta út. Samtökin hafa endurskipulagt sig. Þú sérð al-Kaída birtast á svæðum sem við héldum að svæfu.“

Breska ríkisstjórnin ætlar að verja 25 milljónum punda til verkefnis sem á að vernda flugvélar gegn „ógnum innan frá“.

„Al-Kaída er risið upp á nýjan leik. Þeir hafa endurskipulagt sig. Þeir munu gera sífellt fleiri tilraunir til að ráðast á Evrópu og hafa tileinkað sér nýjar aðferðir og vilja enn ráðast á flugiðnaðinn.“

Hann sagði að eftirlit á flugvöllum væri orðið það gott að litlar líkur séu á að hægt sé að smygla sprengiefnum um borð í flugvélar. Þetta leiði til þess að hryðjuverkamenn horfi annað.

„Þeir hafa kannað aðrar leiðir til að koma sprengiefnum um borð í flugvélar. Við höfum rætt opinberlega um hættur innan frá. Ef þú kemst ekki inn um aðaldyrnar verður þú að reyna að komast inn bakdyrameginn.“