Verðsamanburður DV leiðir í ljós að verð á vinsælu hlaupaúri í Elko er 100 prósent dýrara í Elko en í Danmörku. Munurinn er enn meiri, miklu meiri raunar, í samanburðarverslununum í Noregi og Bretlandi.

DV kannaði upphaflega verð á Forerunner 235-hlaupaúri. Verð á því var um 75% hærra hér en í samanburðarlöndunum. Gestur Hjaltason, framkvæmdastjóri Elko, bar því við að sú tiltekna vara hefði verið of hátt verðlögð. Umboðsaðili hafi fallist á lækkun og útsöluverðið lækkað í kjölfarið. DV kannað þá aðra týpu, þá sem hér sést. Á því er enn meiri verðmunur.

Skýringin sem hann gaf á þessari verðlagningu var sú að um væri að ræða vöru á „útleið“. Erlendir aðilar væru alltaf á undan að lækka hjá sér verð, því þeir væru hluti af stærri keðjum. Hann sagði að mjög fljótlega færi þetta úr í lækkunarferli hjá Elko.

Þess má geta að varan kostar það sama í dag, föstudag, og hún kostaði fyrir viku, þegar greinin var unnin.

Gestur sagði við DV að almennt væru þeir hjá Elko óhressir ef verðið væri ekki svipað eða að hámarki 10–14% hærra hjá þeim en hjá samstarfsaðilum þeirra á hinum Norðurlöndunum. DV hefur ekki tekist að finna þeim orðum stað. Þannig verður Playstation 4 pro, sem er væntanleg, 43% dýrari í Elko en í Curry‘s í Bretlandi, svo eitt dæmi sé tekið.