Í upphafi nýrrar viku er ávallt gott að byrja á góðum og hollum graut sem dugar vel út daginn. Í upphafi árs deildi Margrét Leifsdóttir arkitekt og heilsumarkþjálfi með lesendum Fréttablaðsins uppskriftinni af sínum uppáhalds graut sem henni finnst mjög gott að byrja daginn á. Við á matarvefnum getum vel mælt með þessum graut enda er hann með eindæmum góður. Hann er útfærður á skemmtilegan hátt með tvisti sem kitlar bragðlaukana.

Uppáhalds grautur Margrétar

Grautarmix

2 dl hafrar

1 dl hempfræ

½ dl chia fræ

½ tsk. kanill

½ tsk. sjávarsalt

½ tsk. malaðar kardimommur

Þetta á ég í krukku tilbúið, þannig að ég þarf bara að bæta við heitu vatni og tvisti sem tekur enga stund.

Grautur með tvisti

1 ½ dl grautarmix í skál

2 dl heitt vatn bætt í skálina

Mögulega 1-2 litlum dökkum súkkulaðimolum laumað ofan í heitan grautinn

Látið bíða í 3-5 mínútur.

Tvist

Toppað með múslí, möndlusmjöri, smátt skornum epla- eða perubitum, slettu af grískri jógúrt eða kókósjógúrt. Stundum bæti ég frosnum hindberjum við og ef ég ætla að vera sérstaklega flott á því þá set ég þeyttan rjóma í staðinn fyrir gríska. Þessi grautur er prótínríkur og vel samsettur hvað varðar góða fitu á móti kolvetnum. Þannig að hann hefur góð áhrif á blóðsykurinn.