Eldhúsgyðjan okkar María Gomez sem heldur úti bloggsíðunni Paz.is hefur galdrað fram þessa dásamlegu basknesku ostaköku frá Spáni. Þær gerast ekki betri og þessu er fullkomin með aðventukaffinu. Myndi líka sóma sér dásamlega vel um áramótin og bjóða þá upp á freyðandi drykki með.

„Basknesk ostakaka er eitthvað sem þeir sem fara til Spánar falla fyrir og er hún oft kölluð Tarta de queso de la viña. Ástæðan fyrir vinsældum hennar er líklegast áferðin og bragðið, en kakan er bökuð líkt og New York ostakakan. Munurinn á þessum tveimur kökum er þó mikill hvað varðar bragð og áferð en baskneska ostakakan er með brennda stökka kanta og mjúka miðju,“ segir María.

Ostakakan er brennd ofan á og á hliðunum, með mjúka búðingslega miðju og engan botn eins og er í hefðbundnum ostakökum. Basknesk ostkaka á rætur sínar að rekja til San Sebastian, nánar tilgetið á bar sem hét La viña og þaðan er nafn hennar dregið. Við mælum með að þú prófir að gera þessa köku enda er hún fáránlega auðveld og inniheldur einungis 5 hráefni sem þú getur hrært saman í höndunum.

Eins og María segir er algjör skylda að hafa öll hráefnin við stofuhita, þannig getið þú bakað þessa og fengið hina fullkomnu útgáfu.

Basknesk ostakaka frá Spáni

600 g Philadelphia Original rjómaostur

3 dl rjómi

230 g sykur

4 egg

2 msk. hveiti

Byrjið á því að kveikja á ofninum á undir og yfirhita (alls ekki blástur) á 230 °C. Takið fram 18-20 cm smelluform með háum hliðum (minnst 7 cm hátt) og setjið smjörpappír inn í formið og látið pappírinn standa vel upp úr með köntunum. Munið að hafa öll hráefnin við stofuhita, og takið fram skál og písk. Setjið rjómaostinn og sykurinn saman í skál og hrærið saman með písknum. Bætið næst eggjunum út í eitt í einu og hrærið með písknum á milli og bætið þá hveitinu út í og hrærið. Setjið svo rjómann að lokum og hrærið vel saman þar til allt er vel blandað saman og hellið svo í formið. Stingið í ofninn í 40 mínútur og þegar sá tími er liðinn slökkvið þá á ofninum og látið kökuna vera áfram í ofninum þar til hún kólnar. Stingið kökunni þá inn í ísskáp í minnst 4 klukkustundir og berið svo fram.

Þessi dýrindis ostakaka sómir sér líka afar vel í áramótaboðinu með freyðandi drykkjum og gleður bragðlaukana.