Sjónvarpskaka hefur glætt hjörtu, bragðlauka og maga Íslendinga í áratugi og hefur spurningin þá vafalaust oft brunnið á maulurum kókoskökunnar: Af hverju heitir hún sjónvarpskaka?

Eins og við svo mörgu öðru, geymir Internetið svar við þessu. Á vef Vísindavefsins segir Guðrún Kvaran að uppruni nafns kökunnar megi rekja til upphafs sjónvarpsútsendinga hér á landi í lok september árið 1966. Sjónvarpið sendi þá út tvisvar í viku.

Í lok október það sama ár, þegar mánaðarafmæli sjónvarpsútsendinga á Íslandi nálgaðist, birtist grein í Alþýðublaðinu í þættinum „Kökur og brauð,“ þar sem segir:

Og af því að nú sitja allir og horfa á sjónvarpið að minnsta kosti tvisvar í viku, er ekki úr vegi að koma hér með uppskrift að sjónvarpsköku, sem er gott að narta í, meðan horft er á sjónvarpið.

Samkvæmt svari Guðrúnar á Vísindavefnum er þessi umrædda grein elsta dæmið sem hún hefur fundið um orðuð sjónvarpskaka.

Þess má þá geta að þó uppruni orðsins sé frá örófi sjónvarpsaldarinnar kann framþróun og ævintýragirni mannkyns sér engin takmörk og hefur sjónvarpskakan þróast í ýmsar áttir síðan sjónvarpið var sent út tvisvar í viku. Þannig benti Fréttanetið til dæmis nýverið á uppskrift af sjónvarpskökusnúðum, sem allir sannir aðdáendur sjónvarpskökunnar hljóta að vilja prófa.