Vegan laufabrauð hafa verið vinsæl síðan þau komu á markað hjá Gæðabakstri í byrjun nóvember og rjúka út eins og heitar lummur. Vegan laufabrauðin seldust meira að segja upp hjá Veganbúðinni í fyrra.

,,Nú er íslenska vegan samfélaginu að fjölga gífurlega hratt og vöruþróun eltir eftir því. Það er svo ótrúlega gott að fólk geti verið partur af jákvæðri þróun án þess að þurfa að fórna því sem þeim þykir gott og því er ég virkilega glöð að Gæðabakstri hafi tekist svona vel að steikja laufabrauð án dýraafurða,“ segir Linda Ýr Stefánsdóttir, verslunarstjóri hjá Veganbúðinni.

,,Hátíðir hafa alltaf snúist mikið um hefðir og þó að það eigi sér stað lífsstílsbreytingar hjá fólki eða vitundarvakning um velferð dýra þá eru hefðir grænkerum ekki síður mikilvægar.
Ég varð vegan dýranna vegna fyrir um fjórum árum en þykir þó ákaflega vænt um þær jólahefðir sem ég ólst upp með, partur af því er til dæmis að borða hangikjöt og laufabrauð á aðfangadag. Ég hlakka allavega til að njóta hangirúllu frá Jömm og vegan laufabrauðs frá Gæðabakstri þessi jól og er ekki ein um það þar sem laufabrauðin seldust upp hjá okkur í Veganbúðinni seinustu jól og eru aftur farin að rjúka út núna strax í nóvember,“ segir Linda ennfremur.