Silja Úlfarsdóttir gæti borðað sama hlutinn daglega og finnst ekki gaman að elda. „Enda er matseðillinn frekar einfaldur. Flókin matseld hreinlega stressar mig. Ég skoða ekki uppskriftir og hugsa: Vá, hvað mig langar að prófa þetta!“ segir Silja.
„Ég læt stundum strákana mína, sem eru níu ára og ellefu ára, sjá um matinn og hjálpa þeim að elda. Mér finnst mikilvægt að þeir læri að elda og mér finnst ágætt að þurfa að gera það ekki sjálf. Þeir hafa til dæmis eldað hakk og spagettí, pítur, ommilettur, eggjabrauð og samlokur.“
Silja deildi með okkur uppskrift af rétti sem hún eldar og er virkilega girnilegur: KFC kjúllinn, eins og strákarnir hennar kalla þetta. Uppskriftina má sjá hér fyrir neðan:
Hráefni:
Kjúklingalærakjöt (úrbeinað)
Beikon
Frosið grænmeti
Saltlaust smjör
Gróft salt
Aðferð:
Kjúklingalærakjötið er steikt á pönnu með saltlausu smjöri, strái grófu salti báðum megin.
Þegar þetta er búið að eldast í smá tíma báðum megin þá set ég beikon ofan á og frosið grænmeti á pönnuna og inn í ofn í 20 mínútur í 200 gráður.
Meðlæti er oftast hrísgrjón eða sætar kartöflur, franskar fyrir strákana. Og ómissandi er Barbíkjúsósan frá Hamborgarafabrikkunni.
