Mamma gaf mér uppskrift að túnfisksalati, dúllan sem hún er, en það hefur aldeilis slegið í gegn hjá fjölskyldunni. Það er súper einfalt og gott – Ora chili túnfiskur, mæjó og egg, ekkert annað. Chili túnfiskurinn er svo bragðmikill að það þarf ekkert að krydda þetta meira.
Salatið er svo gott að ég gæti borðað það eintómt en ég átti hamborgarabrauðin góðu í frysti og datt í hug að búa mér til svokallað „tunamelt“, sem er víða að finna á matseðlum í Bandaríkjunum. Ég bætti selleríi í salatið og því má alveg sleppa, en mér finnst það algjört möst. Ég ristaði hamborgarabrauð í brauðristinni, skellti cheddar osti yfir og bræddi hann svo á hæðsta hita undir grillinu í ofninum í fimm mínútur. Gæða skyndibiti á núll einni.
Hvernig er annað hægt en að elska ketólífið?
Hamborgarabrauð – Hráefni:
½ bolli möndlumjöl
½ bolli kókoshveiti
½ bolli hörfræmjöl
1/3 bolli husk
1 tsk. laukduft
1 tsk. hvítlauksduft
1 tsk. salt
1 tsk. matarsódi
2 tsk. cream of tartar
2 egg
6 eggjahvítur
2 bollar sjóðandi vatn
Aðferð:
Ofninn hitaður í 175°C. Þurrefnum blandað saman fyrst, svo eggjum og að lokum vatni. Sesamfræ á toppinn ef vill. Bakað í 45 til 50 mínútur, en þessi uppskrift gefur sirka átta brauð.
Túnfisksalat – Hráefni:
1 dós Chili túnfiskur frá Ora
½ bolli mæjónes
2–3 egg
½-1 sellerístöngull, saxaður
Aðferð:
Öllu blandað vel saman. Síðan sker ég hamborgarabrauð í tvennt, smyr salatinu á hvorn helming, cheddar ost yfir og inn í ofn á hæðsta grillstyrk í fimm mínútur. Þessi túnabræðingur er algjört uppáhald.
