Kjöthleifur er mjög vinsæll í minni fjölskyldu þannig að þegar að ég byrjaði á ketó mataræðinu var þetta enn ein fjölskylduuppskriftin sem ég breytti örlítið til að gera ketó.
Þessi kjöthleifur er brjálæðislega góður, en með honum ber ég fram blómkálstrítla sem eru alveg eins og djúpsteiktar parísarkartöflur. Algör veisla en samt svo auðvelt.
Hleifurinn er sjálfur svo rakur að mér fannst sósa óþörf, en það er náttúrulega smekksatriði.
Hráefni:
4-500 g hakk
1 pakki beikon (til að vefja utan um)
½ laukur raspaður
3-4 hvítlauksgeirar, raspaðir
1 egg
¼ bolli hörfræmjöl
½ tsk. salt
¼ tsk. pipar
½ tsk. ítalskt krydd eða oreganó
1-2 tsk. balsamic edik
lúka af steinselju, smátt söxuð
100 g ostur
Aðferð:
Hitið ofninn í 180°C. Öllum hráefnum, nema osti, hrært saman og best að nota hendurnar. Leggið beikonið í form, en ég notaði 10×23 sentímetra álform sem passar akkúrat. Helmingurinn af hakkinu fer því næst í formið. Svo tek ég sirka 100 grömm af osti, en ég mæli með Óðals Hvarti kryddosti. Ég sker hann í passlega bita sem ég raða eftir miðju. Restin af hakkblöndunni fer ofan á ostinn og þá breiði ég beikoni yfir dýrðina. Baka í 45 til 50 mínútur og smá yfirgrill í lokin til að brúna beikonið.
Hráefni:
½-1 blómkálshaus
½-1 bolli rifinn ostur
1 egg
½ tsk. salt
½ tsk. reykt paprika
¼ tsk. cayenne
1–2 tsk. ólífuolía
pipar
Aðferð:
Hitið ofninn í 200°C. Blómkálsblómin soðin og safinn kreistur úr þeim eins mikið og hægt er. Blómkálið sett í matvinnsluvél ásamt hinum hráefnunum. Unnið saman, samt ekki í mauk. Muffinsform spreyjað með baksturspreyi eða smurt með smjöri. Blöndunni skipt á milli formanna og baka í 20 mínútur.
