Það vakti mikla athygli í vikunni þegar að Miðflokksmennirnir Gunnar Bragi Sveinsson og Bergþór Ólason sneru aftur á þing eftir leyfi frá þingstörfum eftir Klausturmálið svokallaða.
Gunnar Bragi og Bergþór voru í hópi þingmanna á Klaustri sem töluðu á niðrandi hátt um samstarfsmenn sína og ýmsa minnihlutahópa, en Gunnar Bragi hefur borið við minnisleysi, eða svokölluðu óminni sökum áfengisneyslu. DV sýndi fram á í gær að það stangaðist á við það sem Gunnar Bragi hafði sagt í viðtali rétt eftir að málið kom fyrst upp.
Leikarinn Karl Ágúst Úlfsson, sem hafði það að ævistarfi um áratugabil að gagnrýna stjórnvöld og rýna samfélagið með félögum sínum í Spaugstofunni, birtir ansi vel heppnaða ádeilu á Facebook síðu sinni sem hefur verið deilt mörg hundruð sinnum. Um er að ræða matseðil Miðflokksins þar sem á boði eru til dæmis súrir karlpungar, sviðnar fórnarlambslappir, söltuð hrossakaup, húrrandi klikkuð sviðakunta og súrsaður syndabaggi – „Allt borið fram í 36 klukkustunda blakkáti.“
MATSEÐILL:
– súrir karlpungar
– sviðnar fórnarlambalappir
– barhangikjöt með uppstúf
- svínasulta
- kaldar axlir
– söltuð hrossakaup
– heilir og hálfir tíkarskrokkar sem typpi duga í (loksins)
- húrrandi klikkuð sviðakunta
- kvalarengi
- kæstur smákall
- súrsaður syndabaggi
- forhert Klausturbleikja
- smokkur í smjöri
- velferðarsvið
Allt borið fram í 36 klukkustunda blakkáti.
GLEÐILEGAN BÓNDADAG!
