Vatnsleikfimi er frábær líkamsrækt sem hentar bæði fullfrísku fólki og fólki með ýmis stoðkerfisvandamál, bakverki, vefjagigt eða slitgigt. Jóna Örlygsdóttir íþróttakennari hefur um árabil boðið upp á hressandi og skemmtilega vatnsleikfimi í Mýrinni í Garðabæ (TM-höllin).
„Vatnsleikfimin hjá mér er ætluð fólki á fjölbreyttum aldri, eina skilyrðið er að njóta þess að hreyfa sig á sínum forsendum,“ segir Jóna en hennar þjálfun byggist upp á fjölbreyttum æfingum til að auka liðleika, styrk og úthald. Áherslan í leikfiminni er lögð á að nýta vatnið sem mótstöðu til að bæta hreyfigetu og auka líkamlega færni. Margir sem mæta eru með gigtarvandamál, bakverki og önnur stoðkerfiseinkenni, aðrir eru tiltölulega heilsuhraustir og er leikfimin þá góð viðbót við aðra hreyfingu. „Maður getur svo margt í vatni sem ekki er gott að gera á þurru landi og ávinningurinn af því hafa vatnið sem mótstöðu er mikill. Meiðslahætta er nánast engin og líðanin eftir hreyfingu í vatni er alveg dásamleg.“
Jóna kennir vatnsleikfimi fimm daga vikunnar og er yfirleitt með tvo til þrjá hópa á dag. „Ég gæti þess að hafa hópana ekki of stóra, það er nauðsynlegt að hver einstaklingur fái leiðbeiningar samkvæmt sinni getu,“ segir Jóna. „Ég legg líka mikið upp úr því að kynna mér ástand hvers og eins og hafa þjónustuna eins persónulega og hægt er. Ég hef mikla og góða reynslu af þjálfun, starfaði til dæmis lengi á Heilsustofnun NLFÍ í Hveragerði, hef starfað á líkamsræktarstöðvum og undanfarið hef ég líka verið í samstarfi við starfsendurhæfinguna VIRK.“
Næstu námskeið í vatnsleikfiminni fara í gang þann 11. september og hægt er að nálgast allar upplýsingar á Facebook-síðunni Mýrin vatnsleikfimi.
Skráning er hafin og skal skrá sig með því að senda skilaboð á Facebook eða senda tölvupóst á netfangið g-jona@internet.is.