Sveitahótelið Eldhestar er staðsett á fögrum stað að Völlum í Ölfusi, í um 45 mínútna akstursfjarlægð frá Reykjavík. Þar er hægt að njóta gistingar í hlýlegu herbergi með fallegu útsýni, fara á hestbak og snæða krásir á jólahlaðborði. „Þetta er jólahlaðborð í sveitinni, við leggjum mikið upp úr kyrrðinni og að gestir okkar eigi notalega stund saman. Þetta hentar afskaplega vel fyrir smærri hópa, lítil fyrirtæki eða vinahópa,“ segir Hróðmar Bjarnason framkvæmdastjóri Eldhesta.

Jólahlaðborðið verður í boði síðustu tvær helgarnar í nóvember og fyrstu helgina í desember. Hægt er að kaupa jólahlaðborðið eitt og sér en flestir kjósa að gista líka og gera dálítið meira úr dvölinni en bara borðhaldið. „Það eru fínar gönguleiðir hér í kring og þar sem við erum á flatlendi er fallegt útsýni í allar áttir. Staðsetning hótelsins er einnig góð til að upplifa norðurljósin ef þau láta sjá sig. Dyr liggja frá herbergjum út í garð, það eru tveir heitir pottar á staðnum og svo eru margar áhugaverðar hestaferðir í boði. Það er því tilvalið að koma um miðjan dag, fara á hestbak, fara síðan í heita pottinn og því næst klæða sig upp í rólegheitum fyrir hlaðborðið,“ segir Hróðmar.

Matseðillinn fyrir jólahlaðborðið er klár og meðal kaldra rétta verður reyktur og grafinn lax, síldartríó, hangikjöt og sjávarréttasalat. Heitir réttir eru hamborgarhryggur, heilsteikt lambalæri, grísapurusteik og kalkúnabringa. Einnig er úrval af brauði, heitar og kaldar sósur, sykurbrúnaðar kartöflur, rósmarín-kartöflur, kartöflusalat, heimalagað rauðkál, maís, grænar baunir, eplasalat og fleira. Í eftirrétt er ávaxtasalat, heimagert Tiramisu, bökuð epli með karamellu, jólaostakaka og fleira.

Það borgar sig að panta snemma til að komast á þetta margrómaða jólahlaðborð í notalegu umhverfi. Hægt er að senda fyrirspurn á info@eldhestar.is eða hringja í síma 480-4800. Frekari upplýsingar um Eldhesta eru síðan á vefsíðunni hoteleldhestar.is og um Eldhesta á www.eldhestar.is.