Hjónin Gunnar Kr. Þórðarson bifvélavirkjameistari og Sólveig Jónasdóttir grunnskólakennari eiga og reka Samgönguminjasafnið í Stóragerði við Hófsós. Safnið var opnað formlega þann 26. júní 2004 þegar opnuð var 600 fermetra skemma með lítilli gestamóttöku.

„Þetta er fjórtánda sumarið okkar og safnið hefur verið í stöðugri uppbyggingu alla tíð,“ segir Sigríður I. Garðarsdóttir, tengdadóttir þeirra hjóna.

Gunnar byrjaði að safna samgönguminjum mjög ungur og henti aldrei neinu. Hann byrjaði að gera upp bíla um 1980 og er búinn að gera upp nokkra bíla af þeim sem eru á safninu. „Þeir vekja eftirtekt bílarnir sem hann hefur gert upp.“

Safnið var fyrst aðeins einkasafn, en þáverandi sveitarstjóri Skagafjarðar hvatti Gunnar til að opna safnið fyrir almenningi. Á þeim fjórtán árum sem safnið hefur verið opið hefur það stækkað að umfangi og byrjað var á því árið 2010 að stækka salinn, um 800 fermetra, og var því lokið að fullu árið 2013.

Í dag eru um 100 tæki til sýnis í salnum og um 200 bílar og tæki fyrir utan safnið. „Við erum með bíla, vélsleða, mótokrosshjól, dráttarvélar, flugþyt, rútur, strætó og í raun alls konar,“ segir Sigríður.

„Síðastliðin ár höfum við verið ótrúlega heppin með það að fólk gefur okkur tæki í toppstandi sem það vill að við varðveitum áfram.“

Safnið er opið yfir sumartímann fyrir almenning. „Því miður er ekki hægt að hafa opið allt árið því við eigum svo mikið af tækjum að sum standa úti á sumrin, því þurfum við að pakka öllu inn yfir veturinn,“ segir Sigríður.

Formlegur opnunartími Samgönguminjasafnsins er 1. júní til 30. september og er opið alla daga frá kl. 11–18. Nokkrum sinnum yfir sumarið er veglegt kaffihlaðborð sem er vel sótt af heimamönnum, sem og gestum. „Næst er það 1. júlí næstkomandi og á sama tíma er bæjarhátíð á Hofsósi sem er aðeins 12 kílómetrum frá safninu.“

Samgönguminjasafn Skagafjarðar er að Stóragerði við Hófsós, síminn er 845-7400.
Opnunartími er 1. júní til 30. september, alla daga frá kl. 13–18.
Utan þess tíma er opið fyrir hópa samkvæmt samkomulagi.
Heimasíða  og Facebook-síða.