Dómari hefur vísað máli tónlistarkonunnar Bríetar gegn lagahöfundinum Pálma Ragnari Ásgeirssyni og þrotabúi Líms og varahluta (áður Rok Records) frá dómi vegna verulegra ágalla á kröfugerð. Tónlistarkonan hefði breytt kröfum sínum töluvert frá því að hún lýsti almennri kröfu í áðurnefnt þrotabú.
Bríet og Pálmi hófu samstarf árið 2018 þegar tónlistarkonan gaf út sína fyrstu smáskífu. Næstu fjögur árin samdi tvíeykið saman fjölda laga sem er flest að finna á plötunni Kveðja, Bríet. Þar á meðal eru nokkur af þekktustu lögum Bríetar á borð við Esjuna, Rólegur kúreki og Flugdreki.
Tónlistarkonan telur sig hafa verið hlunnfarna í samstarfinu við Pálma og krafðist þess að fá helming af ætluðum streymistekjum af lögunum sem hún og Pálmi gerðu saman. Skiptastjóri hafði hafnað kröfum hennar þar sem ágreiningur væri uppi um eignarhald hljóðritanna. Þá endaði málið hjá dómstólum og þar breytti Bríet kröfugerð sinni og krafðist heldur viðurkenningar á því að hún ætti tilkall til helmings allra tekna sem hefðu skapast eða gætu skapast í framtíðinni af sölu, miðlun og dreifingu hljóðritanna.
Pálmi krafðist frávísunar með vísan til þess að kröfur Bríetar væru óskýrar og að eins hefði þeim verið breytt undir rekstri málsins. Dómari féllst á það með Pálma að verulegir ágallar væru á kröfugerðinni. Kröfur væru óskýrar og ekki studdar nægjanlegum gögnum. Þrátt fyrir að Bríet hefði reynt að ráða bót á þessum annmörkum við munnlegan flutning á málinu hefðu þær breytingar komið of seint fram.
Vísaði dómari svo til þess að samkvæmt lögum um dómsmál sem varða gjaldþrotaskipti þá eigi dómari að leysa úr kröfum sem gerðar hafa verið í þrotabú. Hér hafi Bríet gert kröfu í skiptabúið um tiltekna fjárhæð en fyrir dómi var skyndilega um viðurkenningarkröfu að ræða sem skiptastjóri hafði þá ekki tekið afstöðu til. Eins hafi Bríet gert kröfu um hlutdeild í rétthafagreiðslum í tengslum við notkun laga hennar og Pálma í sjónvarpsþáttum, kvikmyndum og auglýsingum. Dómari tók fram að þessari kröfu hafi engin sundurliðun fylgt um hvaða þætti, myndir eða auglýsingar væri um að ræða.
Þar með var málinu vísað frá dómi án þess að dómari tæki efnislega afstöðu um mögulegan rétt Bríetar til streymistekna af lögum hennar. Þess í stað þarf tónlistarkonan að greiða Pálma 700 þúsund krónur í málskostnað og 200 þúsund til þrotabúsins. Úrskurðurinn var kveðinn upp þann 1. júní í Héraðsdómi Reykjavíkur.
Deilunum er þó ekki lokið því Bríet hefur eins gert kröfu um að fá eignarrétt sinn yfir tilteknum upptökum viðurkenndan. Sú krafa verður tekin fyrir í öðru máli.
