Jónas Már Torfason, lögfræðingur, segir kolröng skilaboð send til barna með því að banna boltaleiki á leikvöllum eftir klukkan 22:00. Sífelldar skorður séu settar á uppbyggilegar tómstundir.

„„Boltaleikir bannaðir eftir kl. 22.00“. Ekki minnist ég að hafa séð svona skilti í minni æsku, hvar margar af mínum björtustu minningum voru á sparkvellinum við Lindaskóla síðla sumarkvölds,“ segir Jónas Már í færslu á samfélagsmiðlum sem vakið hefur talsverða athygli.

„Það má vera ansi þreytandi fyrir ungmenni landsins að fá endalausa útreið í opinberri umræðu; hvað þau séu ósjálfbjarga, léleg til mennta, ofbeldisfull og grilluð af skjátíma,“ segir Jónas Már. „Samtímis eru þeim sífellt settar skorður og aðgengi þeirra að uppbyggilegri tómstund, sem ræktar sjálfstæði þeirra, sjálfsöryggi og þrek, takmarkað. Það er ekki nema von að þau spyrji af einlægni hvar þau megi eiginlega vera?“

„Farið eitthvað annað“

Jónas Már bendir á að útivistartími 13 til 16 ára barna á sumrin sé til miðnættis. Umræða hafi verið um hvort það ætti ekki að lengja útivistartímann.

„Það er ekkert vit í slíku ef ungmenni koma alls staðar að lokuðum dyrum,“ segir hann. „Hvert skal farið þegar klukkan slær tíu og boltaleikjalögreglan segir að ekki megi vera lengur í boltaleik? Í sund? Nei, í Reykjavík loka þær klukkan tíu. Í Kópavogi, þar sem opnunartími sundlauga hefur verið styttur undanfarin ár, loka sundlaugar kl. átta um helgar að sumri til og klukkan sex að vetri til. Kannski í félagsmiðstöð? Þeim sem ekki hefur verið lokað fyrirvaralaust, svo sem í Hafnarfirði og á Akureyri, eru fæstar opnar eftir tíu og hvort er með takmarkaða starfsemi að sumri.“

Með þessu sé verið að senda skilaboð til barna um að fara eitthvað annað.

„Þetta eru kolröng skilaboð til að senda,“ segir Jónas Már að lokum. „Við viljum að ungmenni séu úti í fótbolta eða í kvöldsundi, þar sem þau njóta öruggrar og uppbyggilegrar samveru hvors annars án óþarfa afskipta fullorðinna og truflana tækninnar. Við viljum að þau geri það sem allra, allra mest, ekki bara til klukkan tíu. Ef því fylgir einhvern minniháttar hljóðtruflun að heyra hlátursköll æskunnar við heilbrigðan leik verður bara að hafa það. Hér þarf að gera miklu betur.“