Ísland mun ekki taka þátt í Söngvakeppni evrópskra sjónvarpsstöðva, Eurovision, á komandi ári. Tekin hefur verið ákvörðun um þetta af hálfu RÚV samkvæmt tilkynningu sem undirrituð er af Stefáni Eiríkssyni útvarpsstjóra en tilkynningin var send út skömmu eftir að stjórnarfundi RÚV lauk í Efstaleiti en mótmælendur höfðu safnast saman við útvarpshúsið. Kom fram á blaðamannafundi að það hefði verið ákvörðun framkvæmdastjórnar að taka ekki þátt. Var síðan tilkynnt um ákvörðunina á stjórnarfundinum og því kom ekki til atkvæðagreiðslu um tillögu sem hafði verið lögð fyrir stjórnina um að taka ekki þátt

Í tilkynningunni frá RÚV segir að þátttaka ísraelska ríkissjónvarpsins, KAN, í keppninni hafi að undanförnu valdið óeiningu, bæði á meðal aðildarstöðva Samtaka evrópskra útvarpsstöðva, EBU, og almennings. Þátttaka KAN hafi verið tekin til ítarlegrar umræðu á fundum EBU fyrr á þessu ári, fyrst í London í sumar og í Genf í síðustu viku. Á fundinum í Genf hafi mikill meirihluti aðildarstöðva EBU samþykkt að ýmsar breytingar sem gerðar hafi verið á reglum og framkvæmd keppninnar væru fullnægjandi og því ekki komið til atkvæðagreiðslu um þátttöku KAN í keppninni.

Stefán Eiríksson útvarpsstjóri hafi gert grein fyrir því á fundinum í Genf að þrátt fyrir að breytingarnar kæmu til móts við margar af þeim athugasemdum sem fulltrúar RÚV hefðu gert á ýmsum stigum EBU-samstarfsins síðustu ár væru enn efasemdir að mati RÚV um að þær dygðu til. Ítrekað hefði komið fram að hagsmunaaðilar hér á landi, til dæmis samtök listamanna, og íslenskur almenningur væri andvígur þátttöku í keppninni. Þá hefði stjórn RÚV óskað eftir því við EBU að KAN yrði vikið úr keppninni með hliðsjón af fordæmum.

Málið væri flókið úrlausnar og hefði nú þegar skaðað orðspor keppninnar og EBU. Mikilvægt væri að finna lausn fyrir alla hlutaðeigandi. Ljóst væri miðað við opinbera umræðu hér á landi og viðbrögð við ákvörðun EBU sem tekin var í síðustu viku að hvorki myndi ríkja gleði né friður um þátttöku RÚV í Eurovision. Það sé því niðurstaða RÚV að tilkynna EBU um það í dag að RÚV taki ekki þátt í Eurovision á næsta ári. Söngvakeppnin og Eurovision hafi ávallt haft það markmið að sameina íslensku þjóðina en nú sé ljóst að því markmiði verðo ekki náð og á þeim dagskrárlegu forsendum sé þessi ákvörðun tekin.

Segir að lokum að ekki liggi fyrir ákvörðun um hvort haldin verði söngvakeppni á vegum RÚV á næsta ári. Verið sé að meta fyrirliggjandi kosti í stöðunni og verði ákvörðun um það kynnt þegar hún liggi fyrir.