Margir fagna því að María Corina Machado, stjórnarandstæður í Venesúela, hafi hlotið friðarverðlaun Nóbels. En hér á Íslandi eru margir Sósíalistar ósáttir við valið.
Karl Héðinn Kristjánsson, ritari framkvæmdastjórnar flokksins, er einn af þeim sem er ósáttur við valið.
„Þessi kona styður Ísrael og vill einkavæða olíu Venesúela, færa bandarískum stórfyrirtækjum olíuna og hún er enginn friðarsinni,“ segir hann í athugasemd við færslu Egils Helgasonar sem fagnar útnefningu Machado. Karl Héðinn segir að sænski aktívistinn Greta Thunberg hefði átt að fá verðlaunin.
Undir þetta tekur Guðmundur Hrafn Arngrímsson, formaður Leigjendasamtakanna sem hefur verið í framboði fyrir Sósíalistaflokkinn.
„Vestræn ríki eru friðlaus yfir því að stjórnvöld í Venesúela vilja ekki lúta heimsvaldastefnu USA þar sem þau eru bæði and-kapitalísk og vilja samfélagsnýta auðlindir landsins í þágu fólksins,“ segir Guðmundur Hrafn. „Stjórnvöld í Venesúela hafa verið undir látlausum árasum frá vestrænum ríkjum vegna þess að þau vilja jafnari drefingu auðsins og sósíalískt þjóðskipulag. Það hefur verið einbeitt stefna USA að koma í veg að þeim takist það, þar sem það ógnar stöðu vesturveldanna og því kapítalíska einræði sem þau stunda.“
Annar frambjóðandi Sósíalistaflokksins, Jökull Sólberg Auðunsson, segir kaldhæðnislegt að Nóbelsnefndin hafi veitt Machado verðlaunin. Verið sé að nota verðlaunin sem pólitískt verkfæri til að veita þeim sem ganga erinda vestrænna stórvelda og alþjóðafjármagns mannúðlegan stimpil.
„Machado er ekki friðarsinni. Hún er talsmaður erlendrar íhlutunar, hefur kallað eftir efnahagsþvingunum sem bitna harðast á almenningi og átt í nánu samstarfi við þá sem stóðu fyrir valdaránstilraunum í Venesúela,“ segir Jökull. „Hún hefur sjálf viðurkennt að landið sé ekki „einræðisríki“ en krafist þess að erlendur her skeri úr um framtíð þess.“
Segir hann að bandarísk stjórnvöld hafi undanfarnar vikur verið að skipuleggja árás í Venesúela og starfi þar með stjórnarandstöðunni fyrir opnum dyrum.
„Að veita Machado friðarverðlaun er ekki viðurkenning á friðarbaráttu. Þetta er tilraun til að framleiða samþykki fyrir frekari aðgerðum gegn Venesúela og til að hvítþvo stefnu sem byggir á átökum en ekki sáttum,“ segir hann.
