Frakkar hyggjast verða fyrsta G7-ríkið til þess að viðurkenna Palestínu sem ríki. Frá þessu greindi Emmanuel Macron, forseti Frakklands, í færslu á samfélagsmiðlum og sagði að ákvörðunin væri í takt við þá áherslu Frakka í gegnum árin að langvarandi friður, sem byggðist á réttlæti, liti dagsins ljós fyrir botni Miðjarðarhafs.
Eftir að hafa kallað eftir vopnahléi og „lausn allra gísla“ sagði Macron í færslunni:
„Við verðum að byggja upp ríki Palestínu, tryggja að það geti staðið undir sér, og sjá til þess að með því að samþykkja afvopnun og fulla viðurkenningu á Ísrael, stuðli það að öryggi allra í héraðinu.“
Palestínsk stjórnvöld hafa fagnað ákvörðun Macron sem talinn er geta orðið til þess að fleiri öflugar þjóðir fylgi í kjölfarið, til að mynda Bretar sem og mögulega Þjóðverjar.
Ísrael og Bandaríkin eru hins vegar allt annað en sátt með ákvörðunina. Benjamín Netanjahú, forsætisráðherra Ísraels, lýsti henni sem „skotpalli til að útrýma Ísrael“. Bandaríkin sögðust „hafna yfirlýsingunni alfarið“. Marco Rubio, utanríkisráðherra Bandaríkjanna, kallaði hana „ábyrgðarlausa“.
Sem stendur viðurkenna meira en 140 af 193 aðildarríkjum Sameinuðu þjóðanna Palestínu sem ríki.
Lýsingarorð ná ekki lengur yfir hversu slæmt ástandið á Gaza-ströndinni er orðið. Á sjötta tug Palestínumanna eru sagðir hafa fallið í árásum Ísraela síðastliðinn sólarhring og farið er að bera á andlátum vegna vannæringar en alveg hungursneyð er farin að hafa veruleg áhrif.
