Að minnsta kosti tíu eru dánir eftir að byssumaður hóf skothríð í BORG Dreierschuetzengasse-menntaskólanum í borginni Graz í Austurríki. Talið er að alls hafi 28 hafi særst í árásinni en um er að ræða eitt versta fjöldamorð í sögu landsins.

Austurrískir fjölmiðlar greina frá því að árásarmaðurinn hafi beint sjónum sínum að tveimur skólastofum í skólanum en hann mun hafa verið fyrrverandi nemandi. Hann fannst látinn inni á salerni skólans og er hann sagður hafa svipt sig lífi eftir voðaverkið. Í frétt Kronen Zeitung kemur fram að hann hafi verið 22 ára.

Herma heimildir austurrískra fjölmiðla að árásarmaðurinn hafi talið sig fórnarlamb eineltis.

Myndbönd ganga nú um samfélagsmiðla þar sem sjá má nemendur á hlaupum á meðan að skothvellir heyrast á bak við. Elkhe Khar, borgarstjóri Graz, segir að alls hafi 28 særst í árásinni.

Lögregla hefur verið með mikinn viðbúnað á vettvangi í morgun en að sögn lögreglu er ekki frekari hætta á ferðum.