SpaceX er flugtækniframleiðandi og geimferðafyrirtæki sem Musk stofnaði árið 2002.
Eins og kunnugt er lét Musk af störfum fyrir ríkisstjórn Trumps í síðustu viku og virðist vinskapurinn á milli þeirra hafa súrnað mikið síðustu daga. Hefur Musk til dæmis gagnrýnt fjárlagafrumvarp Trumps og sagt að með því muni hann keyra Bandaríkin í þrot.
Í gær sauð svo endanlega upp úr þegar Musk varpaði sprengju á samfélagsmiðlinum X. „Tími til að varpa stóru sprengjunni. Donald Trump er í Epstein-skjölunum. Það er raunverulega ástæðan fyrir því að þau hafa ekki verið opinberuð. Eigðu góðan dag DJT!“
Hann hvatti svo fólk til að geyma færsluna fyrir framtíðina því sannleikurinn muni koma fram. Trump svaraði fyrir sig og sagði að Musk hefði sturlast því hann tók frá honum rafbílaafsláttinn. Skotin gengu áfram og hótaði Musk því síðan að hann myndi hætta notkun á Dragon-geimfarinu sem gegnir lykilhlutverki í að ferja geimfara NASA til og frá Alþjóðlegu geimstöðinni. Fjórir bandarískir geimfarar eru nú í Alþjóðlegu geimstöðinni.
Tveir mánuðir eru liðnir síðan Dragon-geimfarið kom tveimur bandarískum geimförum til bjargar, þeim Suni Williams og Butch Wilmore, en þau höfðu verið strandaglópar í Alþjóðlegu geimstöðinni í 286 daga.
Steve Bannon, fyrrverandi ráðgjafi Trumps, kallaði eftir því í kjölfarið að Trump myndi þjóðnýta SpaceX, taka fyrirtækið úr höndum Musk, og beita hinni svokölluðu Defence Production, þjóðaröryggisráðstöfn sem á rætur að rekja til Kóreustríðsins.
Í frétt Mail Online er bent á að í reynd gæti það reynst erfitt að gera SpaceX, sem er einkafyrirtæki, upptækt. Þótt fyrrnefnd þjóðaröryggisráðstöfun veiti forsetanum víðtækar heimildir í þágu þjóðaröryggis þá veita þau ekki beinlínis heimild til að þjóðnýta fyrirtæki.
