Kærunefnd útboðsmála komst nýlega að þeirri niðurstöðu að Bláskógabyggð væri skaðabótaskyld gagnvart fyrirtæki en sveitarfélagið hafnaði tilboði þess í útboði vegna byggingu dæluhúss á Laugarvatni á þeim grundvelli að það hefði verið í vanskilum með opinber gjöld.
Fyrirtækið Nýbyggð lagði kæru fram til nefndarinnar. Í úrskurði hennar kemur fram að í útboðsgögnum hafi verið sérstaklega tekið fram að ekki yrði gengið til samninga við bjóðendur sem væru í vanskilum með opinber gjöld á þeim degi sem tilboð yrðu opnuð. Tekið var einnig fram í gögnunum að bjóðendur teldust í vanskilum með opinber gjöld hefðu þeir ekki greitt gjöldin á gjalddaga. Með vísan til þessa var tilboði Nýbyggðar hafnað. Í úrskurðinum kemur fram að þegar tilboðin voru opnuð hafi tiltekin opinber gjöld fyrirtækisins verið fallin í gjalddaga en ekki eindaga.
Nefndin segist hafa lagt það til grundvallar að með þessu hafi Bláskógabyggð verið að nýta sér heimild í lögum um opinber innkaup. Nefndin segir hins vegar að umrætt ákvæði laganna beri að skýra þannig að bjóðandi teldist ekki hafa brotið gegn skyldu um greiðslu opinberra gjalda í skilningi ákvæðisins þegar opinber gjöld væru aðeins fallin í gjalddaga en ekki eindaga. Skilyrði Bláskógabyggðar hefðu því enga þýðingu í málinu enda væru þau óheimil samkvæmt lögunum.
Það er því niðurstaða nefndarinnar að ákvörðun Bláskógabyggðar um hafna tilboði Nýbyggðar, á þeim grundvelli að fyrirtækið væri í vanskilum með opinber gjöld, hefði verið í andstöðu við lög um opinber innkaup. Nefndin segir einnig að fyrirtækið hafi átt raunhæfa möguleika á að verða fyrir valinu í útboðinu en að möguleikar þess hefðu skerst við þetta brot sveitarfélagsins. Það er því álit nefndarinnar að Bláskógabyggð sé skaðabótaskyld gagnvart Nýbyggð vegna kostnaðar fyrirtækisins við að undirbúa tilboðið og að taka þátt í útboðinu.
Úrskurðinn í heild er hægt að nálgast hér.
