Þann 2. september síðastliðinn var þingfest fyrir Héraðsdómi Reykjaness mál sem Héraðssaksóknari hefur höfðað gegn manni fyrir nauðgun.
Manninum er gefið að sök að hafa aðfaranótt sunnudagsins 28. júní árið 2015 brotið gegn sofandi konu með því að nudda kynfæri hennar og stinga fingrum í leggöng hennar. Konan gat ekki spornað við verknaðinum vegna svefndrunga.
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar. Fyrir hönd brotaþola er gerð krafa um miskabætur upp á 2,5 milljónir króna.
Athygli vekur hve langt er um liðið frá því meint brot var framið. Saksóknari í málinu er Matthea Oddsdóttir og var hún ekki tilbúin að veita neinar frekari upplýsingar um málið en koma fram í ákæru, er DV leitaði eftir því, t.d. hvort vitni yrðu leidd fram önnur en brotaþoli og hvaða sönnunargögnum væri til að dreifa í málinu. Segist hún ekki geta tjáð sig um mál ákæruvalds þegar þinghald er lokað en svo er í þessu máli, eins og reyndar flestum kynferðisbrotamálum.
Brot er varða nauðgun fyrnast á 15 árum samkvæmt þeirri fyrningarreglu í almennum hegningarlögum að sök fyrnist á 15 árum ef þyngsta refsing fyrir brot er meira en 10 ára fangelsi. Refsiramminn í nauðgunarmálum er 16 ár.
Þess skal getið að brot gegn börnum undir 18 ára aldri fyrnast ekki.
