„Við verðum á Smáratorgi, á pallinum fyrir ofan Arion banka,“ segir Gréta María Grétarsdóttir, framkvæmdastjóri Prís, nýrrar lágvöruverslunar sem opnuð verður í þessum mánuði.

Megináhersla Prís verður að vera með lægsta verðið á markaðnum. Meðal eigenda verslunarinnar eru fyrrum stofnendur Bónus og Krónunnar en Gréta er fyrrverandi framkvæmdastjóri Krónunnar.

DV spurði Grétu hvort opnunardagur verslunarinnar lægi fyrir en svo er ekki. „Nei, ég vildi svo sannarlega að ég gæti gefið þér upp dagsetningu en svo er ekki. En við opnum í ágúst.“

Fram hefur komið að eingöngu verður hægt að fá afgreiðslu á sjálfsafgreiðslukössum í Prís, ekki verður tekið við reiðufé og afgreiðslutími verður eitthvað styttri en gengur og gerist. Afgreiðslutíminn verður þó ágætlega rúmur því Gréta staðfestir að opið verður í Prís frá 10 til 19 alla daga vikunnar.

„Við teljum að það sé nóg. Við einbeitum okkur að því að skoða hvar við getum náð niður kostnaði til að geta boðið betra verð, því markmiðið er einfaldlega að vera ódýrust á markaðnum. Við munum svo sannarlega gera eins og við getum í því en innkaupsverðið okkar er ekki sambærilegt við það sem samkeppnisaðilarnir fá, það liggur ljóst fyrir,“ segir Gréta, en samkeppnisaðilarnir hafa getað knúið fram lægra innkaupsverð í kraftir stærðar sinnar.

DV spurði Grétu hvort stefnt væri að því að opna fleiri verslanir. „Maður vill alltaf fleiri búðir. Fyrst þarf þessi búð að ganga upp. Það sem við erum að gera ráð fyrir er að neytendur og almenningur í landinu vilji samkeppni og komi þess vegna og versli við okkur. Það hjálpar okkur að sjálfsögðu til þess að við getum opnað fleiri verslanir.“

Aðspurð hvort Prís munu bjóða upp á nýjungar segir Gréta svo vera en ekki sé tímabært að gefa þær upp. En það verði margt sem muni koma fólki skemmtilega á óvart, en þó sérstaklega verðið.

„Það verða alltaf einhverjar nýjungar en fólk verður bara að koma og kíkja.“