Stefán Eiríksson útvarpsstjóri hefur gert stjórn RÚV ohf. grein fyrir því að hann sé tilbúinn að gegna starfi útvarpsstjóra áfram þegar núverandi ráðningartímabili lýkur á næsta ári.

Frá þessu er greint í Morgunblaðinu í dag og vísað í svar hans við fyrirspurn blaðsins í smáskilaboðum.

Stefán var ráðinn útvarpsstjóri í janúar 2020 en ráðningartímabilið rennur út í lok janúar á nýju ári. Hann lýsti því í viðtali í Bítinu í fyrra að hann hefði í hyggju að hætta eftir fimm ára starf hjá RÚV. Hann hefði litið á þetta sem fimm ára verkefni.

„Ég hef verið um það bil fimm til tíu ár á hverjum stað. Mér finnst það hæfilegt og eðlilegt fyrir stjórnanda; bæði fyrir viðkomandi sjálfan og ekki síður fyrir viðkomandi stofnun eða rekstur,“ sagði Stefán í viðtalinu.

Stefán segir við Morgunblaðið að málið sé á borði stjórnar samkvæmt lögum.