Mál manns í mikilli yfirþyngd sem sat í einu sæti í flugvél hefur vakið upp miklar umræður á samfélagsmiðlum. Segja sumir það ekki aðeins varða þægindi að mjög feitt fólk kaupi tvö sæti heldur einnig öryggi.
Breska blaðið Daily Mail greinir frá þessu.
Maðurinn sem um ræðir var að ferðast frá Helsinki í Finnlandi til Kaupmannahafnar í Danmörku. Það er stutt flug, um einn klukkutími og fjörutíu mínútur að lengd. Engu að síður er ljóst að flugið hafi ekki verið þægilegt fyrir þann sem sat við hliðina á manninum sem átti greinilega í erfiðleikum með að komast fyrir í sætinu sínu.
„Þessi maður sat fyrir aftan mig í flugi á leið frá Helsinki til Kaupmannahafnar í gær,“ skrifaði sá sem tók myndina í færslu á samfélagsmiðlum. „Ég vorkenndi honum og náunganum sem sat við hliðina á honum, þeim hefur báðum ábyggilega liðið illa í þessu stutta flugi.“
Þegar maðurinn hafi svo farið á klósettið og gengið eftir þröngum flugvélaganginum hafi hann þrýst á aðra farþega sem sátu við ganginn.
Í umræðum um málið er nefnt að flugfélagið hefði átt að skikka manninn til að kaupa tvö samliggjandi sæti.
„Sama hvers vegna einstaklingur er í yfirþyngd, ef hann er það, ætti hann að kaup auka miða. Það er ekki mismunun, það er öryggisatriði,“ sagði einn.
Fleiri taka undir það. „Ég er sammála því að ef þú kemst ekki fyrir í sætinu þínu ættir þú að kaupa annað. Sama hvort við séum sátt við stærð sætanna, þú ert að kaupa þetta ákveðna rými í vélinni og þú ættir ekki að leka yfir í rými annarra,“ segir annar. Sá þriðji nefnir að fólk ætti að vera vigtað í sæti, líkt og farangur sé vigtaður.
Sumir nefna þó að sæti í flugvélum séu of lítil. Flugfélögin ættu að hafa þau rýmri, ekki aðeins fyrir feitt fólk heldur alla. Fólk sé almennt að verða stærra. Flestum líði ekki mjög vel í flugvélasætum. „Ég kaupi alltaf auka sæti eða fleiri þegar ég fer í viðskiptaferðir,“ segir einn.
