Vladímír Pútín gerir sér ekki lengur vonir um að sigra í stríðinu í Úkraínu með hraðri sókn. Þess í stað er hann sáttur við að stríðið sé orðið að úthaldsstríði þar sem reynir á úthald beggja stríðsaðila. Með því vonar hann að Rússar geti lagt úkraínskt land undir sig hægt og bítandi.

Þetta segir í greiningu frá bandarísku hugveitunni Institute for the Study of War. Greiningin var birt í kjölfar ræðu sem Pútín hélt í Sankti Pétursborg á föstudaginn. Þar ræddi hann meðal annars um stríðið.

Hann sagði að engin þörf sé á nýrri stórri herkvaðningu því Rússar reyni ekki lengur að vinna skjótan sigur. Hann sagði núverandi herlið Rússa í Úkraínu sé nógu stórt til að tryggja sigur með því að hrekja úkraínskar hersveitir hægt og bítandi aftur.