Bandarísk stjórnvöld hafa fellt úr gildi bann við að hin umdeilda úkraínska Azov-herdeild megi nota bandarísk vopn í baráttunni við rússneska innrásarliðið.

The Washington Post skýrir frá þessu og hefur eftir heimildarmönnum í bandaríska utanríkisráðuneytinu.

Ákvörðunin var tekin eftir rannsókn á hvort herdeildin hafi tekið þátt í mannréttindabrotum. Utanríkisráðuneytið fann engar slíkar sannanir í rannsókn sinni að sögn The Washington Post.

Herdeildin getur því framvegis notað vopn sem Bandaríkjamenn gefa Úkraínu.

Azov-herdeildin er hluti af úkraínska þjóðvarðliðinu og var sett á laggirnar til að berjast gegn aðskilnaðarsinnum, sem eru hliðhollir Rússum, sem tóku þátt í að hertaka Krím 2014.

Herdeildin hefur alla tíð verið umdeild vegna tengsla hennar við öfgahægrimenn og öfgaþjóðernissinna.

Í Úkraínu er herdeildin hyllt fyrir að hafa barist af krafti gegn rússneska innrásarliðinu. Herdeildin veitti til dæmis rússneska innrásarliðinu harða mótspyrnu í baráttunni um stóra stálverksmiðju í Maríupól i upphafi stríðsins.

Rússa skilgreina herdeildina sem hryðjuverkasamtök en það gerir þeim kleift að dæma meðlimi hennar í langvarandi fangelsi. Þeir segja hana einnig vera herdeild nasista en þeir hafa ítrekað notað ásakanir um nasisma sem átyllu fyrir innrásinni.