Pósturinn hefur nú opnað nýjan fyrirtækjavef sem nefnist Fyrirtækjasíður. Um er að ræða þjónustuvef fyrir öll fyrirtæki. Þróun nýja vefsins fór meðal annars fram í samstarfi við viðskiptavini sem komu á framfæri ýmsu sem mætti bæta við eða breyta, eins og segir í tilkynningu.
Sigríður Heiðar, forstöðumaður söludeildar Póstsins, fagnar þessum áfanga. Hún segir nýjan þjónustuvef bjóða upp á ýmsa möguleika. „Nýtt kerfi veitir okkur meiri sveigjanleika til að bregðast fljótt við óskum viðskiptavina. Til dæmis vildu viðskiptavinir okkar geta pantað bíl með skömmum fyrirvara inni á vefsvæðinu og við því var orðið.“
Fyrirtækin geta séð sendingar á leiðinni til sín og nú er mun auðveldara að skrá og rekja sendingar. Svo er möguleiki fyrir hvert fyrirtæki að stilla verð, sum kjósa að hafa sendingarkostnaðinn innifalinn ef keypt er fyrir ákveðna upphæð svo dæmi sé tekið.
„Við leitum stöðugt leiða til að spara viðskiptavinum tíma og handavinnu. Það er margt sem fellur undir þetta á nýja vefnum en gott dæmi er sá möguleiki að geta afritað sendingar. Þá þurfa netverslanir ekki að skrá allar upplýsingar aftur inn í kerfið ef viðskiptavinurinn er til dæmis einungis að skipta í rétta stærð,“ segir hún.
Enn fremur segir hún fyrirtækjaeigendur ánægða með að geta stýrt aðgangi starfsmanna og skilgreint mismunandi starfstöðvar. „Þetta eru allt nýjungar sem mælast vel fyrir og þau fyrirtæki sem hafa fært sig yfir á Fyrirtækjasíðurnar eru sérlega ánægð með viðmótið, segja það gagnsætt og þægilegt í notkun.“
Nú er vefurinn kominn í almenna notkun og segir Sigríður notendur vera duglega að veita endurgjöf. „Kerfið er í stöðugri þróun og við höldum ótrauð áfram. Næst á dagskrá er að bæta Tollamiðlun inn á vefinn en stefnan er að hafa allt sem varðar póstmálin á einum stað og einfalda viðskiptavinum okkar lífið.“
Verslun hefur færst að miklu leyti yfir á netið á örskömmum tíma svo bregðast verður skjótt við. „Pósturinn hefur verið að þróa og uppfæra alla sína ferla í stafrænu umhverfi og segja má að Fyrirtækjasíðurnar séu svar við þessum hröðu breytingum. Við þurfum að vera sveigjanleg, vakandi fyrir nýjungum og ekki síst að huga að öryggi í öllu sem varðar póstsendingar.“
