Fulltrúar Sjálfstæðisflokks og Framsóknarflokks höfnuðu í dag tillögu Viðreisnar og Garðabæjarlistans að bjóða upp á þjónustu næturstrætó.
Eins og greint hefur verið frá munu Hafnfirðingar hefja tilraunakeyrslu næturstrætó í haust, frá 1. október til áramóta. DV greindi frá því um helgina að Kópavogsbær myndi ekki taka þátt í verkefninu og mun næturstrætó því keyra í gegnum Kópavog án þess að stoppa á leið sinni til Hafnarfjarðar.
Það sama á við um Garðabær. Næturstrætó mun keyra í gegnum bæinn án þess að stoppa.
Í bókun Sjálfstæðisflokks og Framsóknarflokks á fundi bæjarráðs segir að leggja þurfi áherslu á grunnþjónustu strætó þegar forgangsraða þurfi verkefnum í erfiðu rekstrarumhverfi.
„Farið var í tilraunaverkefni með næturstrætó á síðasta ári en fjöldi farþega í því verkefni stóð ekki undir væntingum,“ segir í bókuninni.
Létu flokkarnir einnig bóka að það þurfi að rýna innanbæjarleiðirnar 22, 23 og 24. Það er leiðir sem liggja um Urriðaholt, Vetrarmýri, Ásgarð, Sjáland og Álftanes.
Fulltrúar Viðreisnar og Garðabæjarlistans telja næturstrætó mikilvægan valkost fyrir alla íbúa höfuðborgarsvæðisins.
„Við teljum mjög mikilvægt að mæta ungu fólki sérstaklega með öruggum samgöngum á milli sveitarfélaga á höfuðborgarsvæðinu og viljum svara kalli stúdenta sérstaklega um að tryggja öruggan og traustan ferðamáta að næturlagi,“ segir í bókun þeirra. „Við teljum mikilvægt að hlusta á ungt fólk og mæta þeirra þörfum.“
